2010-11-27

Nome illumináu.

Ún de los encargos d'esti branu, de xuru'l que más trabayu me llevó. Un nome illumináu nel estilu de los Evanxelios de Lindisfarne, onde cada lletra tien la so propia decoración onde rescampla la fecha de páxaros entellazaos.
De tolo que fixe hasta agora parezme de lo más curiosín.

2010-11-14

Diseñu de camiseta Chigre'l Corquiéu

El Chigre'l Corquiéu, de Ribeseya, ta a piques de cellebrar el so quinto aniversariu y, pa conmemorar esti fechu, encargáronme'l diseñu d'una camiseta onde teníen que tar representaos los siete miembros del grupu. El resultáu final ye'l que tenéis enriba d'estes llínies.

2010-08-30

Nuevu dibuxu: La Neña Picta III


Equí tenéis el resultáu final, la illustración coloreada con Photoshop CS2. Si calcáis enriba la imaxe podréis decatavos meyor de los detalles que-y dan sensación de volume gracies a les solombres. El xeitu quedó-y un poco murniu... pa la siguiente de xuru que sal meyor.

2010-08-26

Cartelu II Xornaes Céltiques del Oriente d'Asturies

Segunda edición d'estes xornaes y segundo cartelín que m'encarguen :)
Foi un pocu abegosu facelu en billingüe, camiento que diba quedar meyor n'asturianu o en castellán namás, pero yera mandatu de los veceros. Prestómeabondo trabayar con testures de maera coloreada, influencia del trabayu d'Ástur Paredes de la que ye fácil decatase.
El trisquel y los animales entellazaos son orixinales de mió fechos pa la ocasión.

2010-08-25

Nuevu dibuxu: La Neña Picta 2

Siguimos alantre cola mesma illustración, el dibuxu a llápiceru yá foi entintáu y entamó'l procesu de pintalu dixitalmente col Photoshop CS2.
Agora yá entintáu ye más fácil decatase del diseñu entellazáu del pelo y ver que nun respuende a la estética de los entellazaos celtes que se ven davezu.

2010-08-24

Nuevu dibuxu: La Neña Picta

Debuxu a llápiceru pa una nueva illustración. Nesti casu'l diseñu de los entellazos sigui un estilu qu'amesta dixebraes tradiciones, nun ye tan historicista como n'otres illustraciones míes.
Esti diseñu faigolu a la gueta d'un nuevu estilu más personal, yá veremos lo que somos quien a algamar.

2010-08-23

Val más tarde que...

Depués de dellos meses ensin facer denguna entrada, toi abducíu pol feisbuk, déxovos una amuesa del trabayu atrasáu. Esti foi'l cartelu del Festival Intercélticu d'Avilés que, al paecer, prestó muncho a tol mundu, sigún me cuntaron muncha xente marchaba con él pa casa.
Tamién hai que dicir qu'otros apuntaron que tenía una estética dalgo anticuada, que yera un cartelu de los que se facíen nos años 80 pa les nueches celtes y eventos asemeyaos, nun fai falta dicir qu'esa crítica prestóme pola vida, pa min yeren más guapos los cartelos d'entós que los d'anguañu.

2010-03-27

Logu final pa ECHAs

A la fin, los collacios polacos, refugaron la idega de remanar un trisquel como logu. Fiximos el nome de l'asociación con una caligrafía de tastu célticu decorada con unos entellazos.
Podéis conocer daque más d'esta asociación polaca na so web http://echas.org/

2010-03-09

Xeometríes Máxiques d'Asturies


Illustración pa'l grupu de Facebook Xeometríes Máxiques d'Asturies. Na que s'axunten dellos exemplos de discos solares remanaos n'esteles funeraries de dómina castreño-romana.
Tolos símbolos solares atropaos nesti mural proceden d'esteles atopaes nel antigu Conventus Asturum, qu'amás de gran parte de l'Asturies d'anguaño tamién s'estendía per Lleón, Zamora, Norte de Portugal y parte d'Ourense. Nestos discos tan los antecedentes de lo que sieglos más sero va ser l'Arte Popular d'Asturies.

2010-02-18



Un total de 44 cantares y 17 vidioclips formen l’Anuariu Sonoru ’09, recopilatoriu editáu pol portal dixital d’información musical www.fnast.net y pola asociación Ensame Cultural Sonastur. Nel anuariu, que distribúyese de baldre al traviés d’Internet, recuéyese l’actividá de los grupos asturianos que grabaron discu, maqueta, temes sueltos y/o vidioclip durante l’añu 2009.

Rock, folk, metal, hiphop, pop… son dalgunos de los estilos musicales qu’apaecen nesti Anuariu Sonoru ’09, recopilatoriu caracterizáu pola pluralidá musical fecha n’Asturies. La xeografía d’esta comunidá tamién ta representada nel anuariu; grupos d’oriente a occidente y de norte a sur formen el llistáu de bandes, mentanto que llingües como l’asturiana, castellana, eonaviega o inglesa exprésense xunto a los estremaos soníos.

Basándose na defensa de los organizadores del llibre y másimu espardimientu de la cultura, esti Anuariu Sonoru ’09 distribúyese gratuitamente al traviés d’Internet. Puede descargase na páxina musical www.fnast.net y, xunto a los cantares y vidioclips, acompáñalo un llibretu en formatu pdf con información biográfica sobre los grupos participantes, el nuevu proyeutu d’anuariu y los sos promotores.

L’oxetivu cimeru del Anuariu Sonoru ’09 ye’l de da-y el másimu puxu a la música fecha n’Asturies; una escena musical viva qu’anque amuese bayura y calidá tien qu’enfrentase a numberoses torgues: falta d’infraestructures, carencies informatives xeneralizaes nos medios mayoritarios y apueste insuficiente de les instituciones públiques pa col son compuesto dientro d’estes llendes.

Preparación del Anuariu Sonoru ‘10

Dende los organizadores, Fnast.net y l’Ensame Cultural Sonastur, apuesten por esti nuevu proyeutu y nagüen por que s’afite dientro y fuera d’Asturies, siendo – xunto colos otros dos anuarios asturianos qu’existen yá - un referente pa los que se quieran averar a los ritmos fechos na Comunidá Autónoma. D’esti mou yá s’alcuentren trabayando con tiempu nel Anuariu Sonoru ’10 pa que medre en calidá y participación


Descarga: http://www.megaupload.com/?d=X6TD2OCW

2010-02-17

Trisquel pa Polonia

Nesti intre trabayo nún nuevu proyeutu, un logu pa una asociación polaca acabante de ñacer y que tien como envís espardir y promocionar la cultura de raigón céltico n'Europa, la European Celtic Heritage Association.
Quieren un motivu cenciellu y fácil d'asociar cola cultura celta. Ésta que veis equí ye la mío segunda propuesta, un trisquel cuyos brazos son coles de pexe (el símbolu de Varsovia, sé de l'asociación, ye una serena) que finen n'entellazos.


2010-01-02

Tatuaxe: Cuervu Célticu III


Proseguimos col diseñu d'un Cuervu pa facer un tatuax. La figura'l cuervu yá ye definitiva y cunta'l col preste de la moza que me lo encargó, pero siguimos dando-y vueltes al fondu. Camudamos fueyes de carbayu por otres de yedra y dexamos los entellazos nuna llínea pa nun restar atención del protagonista del diseñu.