Crósog Bríde

La illustración de la Cruz de Santa Bríxida yá rematada. El testu Crósog Bríde quier dicir 'Cruz de Bríxida' en gaélicu irlandés. Anque tenía la idega de facer la illustración a dos tintes, a la fin, decidí añadir una más pa resaltar lo que ye la propia cruz.

Primer bocetu: Crósog Bríde

Primer bocetu a llápiceru d'una illustración cola cruz de Santa Bríxida como motivu central. Tamañu A4.

Trisquel de Cuélebres

Otra illustración fecha por encargu: un trisquel debuxáu pol cuerpu de tres cuélebres. La idega de la persona que me fexo l'encargu ye tatualu na espalda. Como vien siendo vezu d'un tiempu a esta parte la illustración tien abonda influencia de los estilos vikingos de ringerike y urnes.

Diseñu pa tatuaxe

Una nueva illustración, esta vuelta fecha por encargu pa un mozu de Valladolid que quería unos perros entellazaos pa, nel futuru, facer un tatuaxe. Equí son los propios cuerpos de los animales los que faen d'entellazu y, poro, a cada perru di-y un acabáu estremáu pa que se viera ensin problemes que nun son llinies entellazaes al débalu, hai tres cuerpos con un entamu y una fin.

Y yá que falamos d'una illustración fecha por encargu, dicivos qu'aceuto pedíos, si necesitáis facer un cartelu guapu pa dalgún eventu o un logu pa un chigre o lo que vos pete podéis contautar comigo nel email qu'hai perehí colgáu, trabayu rápido y curioso pero, trabayos d'esta mena nun se faen d'un día pa otru...

Nome illumináu.

Ún de los encargos d'esti branu, de xuru'l que más trabayu me llevó. Un nome illumináu nel estilu de los Evanxelios de Lindisfarne, onde cada lletra tien la so propia decoración onde rescampla la fecha de páxaros entellazaos.
De tolo que fixe hasta agora parezme de lo más curiosín.

Cartelu II Xornaes Céltiques del Oriente d'Asturies

Segunda edición d'estes xornaes y segundo cartelín que m'encarguen :)
Foi un pocu abegosu facelu en billingüe, camiento que diba quedar meyor n'asturianu o en castellán namás, pero yera mandatu de los veceros. Prestómeabondo trabayar con testures de maera coloreada, influencia del trabayu d'Ástur Paredes de la que ye fácil decatase.
El trisquel y los animales entellazaos son orixinales de mió fechos pa la ocasión.

Tatuaxe: Cuervu célticu

Una collacia catalana fíxome hai dellos díes l'encargu de diseña-y un tatuax: un cuervu d'estilu célticu. Entá tamos na fase de diseñu presentando bocetos, esborriando y entamando otra vegada. La figura'l cuervu yá la damos por bona, pero la idega d'una daga como fondu nun-y acaba de cuadrar a la interesada. Siguiremos dándo-y al llápiceru.