2011-11-04

Trisquel de Cuélebres

Otra illustración fecha por encargu: un trisquel debuxáu pol cuerpu de tres cuélebres. La idega de la persona que me fexo l'encargu ye tatualu na espalda. Como vien siendo vezu d'un tiempu a esta parte la illustración tien abonda influencia de los estilos vikingos de ringerike y urnes.

2011-10-30

Señaldá

Ún de los caberos encargos foi facer un logu pa un espectáculu de baille tradicional nomáu señaldá, quiso la casualidá que fuera coincidir col entamu la seronda, tiempu afayaízu pa la señaldá como dengún otru.
La illustración nun ye mui complexa, un tetrasquel formáu por cuatro cabeces de muyer, pero abúltame que ta bien representada la idega que queríemos tresmitir. Amás de señaldá, valga pa felicítavos a too la entrada nel añu nuevu celta.

2011-07-17

Cartelu XV Festival Intercélticu d'Avilés



Segundo trabayu que faigo pa'l Festival Intercélticu d'Avilés, na so XVª edición el festival avilesín ta dedicáu a Irlanda y Esbardu, la entidá qu'entama esti eventu, fíxome'l pedimientu que la illustración tuviera dalgo que ver cola isla, quiero dicir con esto que diéronme llibertá dafechu a la hora de trabayar lo que siempre ye d'agradecer.
El venceyamientu del cartelu con Irlanda entama polos colores remanaos nél, que son los de la bandera la República, y fina col motivu central del mesmu que son 4 baillarines irlandeses inspiraes nos grupos de danza tradicional qu'avecen a participar nel festival avilesín procedentes d'Irlanda.

2011-03-31

Diseñu pa tatuaxe

Una nueva illustración, esta vuelta fecha por encargu pa un mozu de Valladolid que quería unos perros entellazaos pa, nel futuru, facer un tatuaxe. Equí son los propios cuerpos de los animales los que faen d'entellazu y, poro, a cada perru di-y un acabáu estremáu pa que se viera ensin problemes que nun son llinies entellazaes al débalu, hai tres cuerpos con un entamu y una fin.
Y yá que falamos d'una illustración fecha por encargu, dicivos qu'aceuto pedíos, si necesitáis facer un cartelu guapu pa dalgún eventu o un logu pa un chigre o lo que vos pete podéis contautar comigo nel email qu'hai perehí colgáu, trabayu rápido y curioso pero, trabayos d'esta mena nun se faen d'un día pa otru...

2011-03-26

Marcapáxines celta de madera

Toi collaborando con una empresa gallega na creación d'una llinia de marcapáxines de madera con diseños orixinales de mió. De cada modelu faese una serie llimitada y numberada de 100 unidaes, les mios illustraciones son caltrizaes con láser en tablines de sapelli de 160mmX30mm, vendiéndose llueu a 10€ la unidá. Esti ye'l primer modelu disponible, pero han venir más.
Si tais interesaos en mercar o comercializar (hai preciu pa vendedores profesionales) estos marcapáxines podéis contautar comigo equí.

2011-03-14

Dos Cuélebres

Nueva illustración terminada, sigo dando-y vueltes a la tema los cuélebres y esta vegada salieron dos d'una tacada, acompañaos de dos culiebrines. Como novedá entamé a colorear con acuareles combinaes coles tintes al agua qu'acostumo a remanar.
El tamañu ye de 185mmX210mm y el papel ye l'habitual de 250gr y sí, ta disponible, si hai daquién que tenga necesidá d'un par de cuélebres pa guardar una ayalga o una encantada nun tien más que dame un toque al corréu que ta perehí escolingáu.

2011-02-28

Illustación d'Arte Celta: Cuervu

Nueva illustración d'Arte Celta a la venta n'Ebay. Agora tocó-y al cuervu que yá visteis l'otru día y, como vien siendo costume nes caberes illustraciones, otra vuelta ye un diseñu qu'amiesta Arte Celta con estilos escandinavos, asina, el cuervu tien una silueta que, como yá vos comentara, ta inspirada nes fíbules escandinaves con forma de páxaru de los sieglos VI y VII. El cuerpu ta decoráu con entellazos más averaos a los que se remanaben nes Islles Britániques nos sieglos VII y VIII.
El preciu de salida ye d'8,95€ y, si vos peta, podéis puxar pola illustración equí

2011-02-18

Nuevu bocetu a llápiceru

Bocetu a llápiceru d'un cuervu vikingu, basáu en broches xermano-escandinavos del sieglu VI-VII. A ver que sal d'equí...

2011-02-12

Illustración d'Arte Celta en venta

El debuxu l'anfisbena yá ta preparáu y colgáu n'Ebay en formatu subasta, el preciu de salida ye 1,95€, que me parez un preciu interesante por un debuxu pintáu a man nuna fueya de papel de 250gr tamañu A4 (cuasi nun cubre nin lo que val la fueya de papel). El casu ye que ye un esperimentu pa ver si ye viable o non comercializar illustraciones d'esta mena n'Ebay. Conociendo otres esperiencies previes nun creo que seya mui rentable, Aidan Meehan (un artista que tien publicaos una montonera de llibros d'Arte Celta) tuvo vendiendo delles illustaciones per esta canal va pocos meses y algamó precios de venta qu'eso, que nun cubren nin el papel nel que tan pintaes... Pero cuido que pue valir como promoción y pa tener un detalle cola xente que sigui'l mio trabayu en facebook o nesti blogue.
los que teis interesaos na puxa podéis facelu equí

2011-02-08

Anfisbena

Nuevu trabayu colos dragones-cuélebres de tema d'inspiración y con influencia nórdica asgaya. Agora ye una Anfisbena, una especie de dos cabeces, la protagonista'l debuxu.
Esta illustración toi faciéndola sobre papel de 250gr, el tamañu ye cuasi un A4 y toi pintándola a man. La idega ye subastala n'Ebay cuando té terminada, yá vos avisaré ;-)

2011-02-03

El Ñeru los Cuélebres

Probando nuevos estilos, equí veis el resultáu de delles hores de tar güeyando pieces d'arte escandinavu medieval. El casu ye que los dragones y culiebres del estilu Urnes siempre se m'asemeyaron afayaízos pa representar el Cuélebre de la nuesa mitoloxía llariega.

2011-01-12

Primer trabayu de 2011


A lo cabero'l 2010 dióme por retomar una vieya afición, la de rabilar cola madera bien pa tallar, bien pa pirograbar. El trabayu en madera siempre me llamó l'atención pero nun soi siempre quién a atropar la paciencia necesaria pa entamar y pa finar proyeutos mediu serios nesi material.
Na semeya podéis ver ún de los escasos proyeutos que fuí quién a finar en tiempu y forma, tres xabariles pirograbaos nuna pieza de faya, depués de da-y un tinte y un barniz satináu al agua. La pieza tien unos 20cm de diámetru.